عيدكم كيف

سامحوني ياحبايب لو ضايقتكم لكن هدا حال جدة في كل سنة في أيام العيد، شركة النظافة نايمة ومافي متابعة من الحبايب اللي ماسكين مشروع نظافة جدة لأنه اللي بشوفو وبيشوفو غيري من سكان جدة أو حتى من غير سكان جدة بصراحة شي يزعل وينرفز ويخلي الواحد يقول بينه وبين نفسه معقولة يكون دا حال جدة أم الرخاء والشدة، معقولة يكون دا حال (جدة غير ) زي ما يحبوا يسموها في كل إجازة وفي كل مهرجان، شي يحزن دا اللي بنشوفو من القمايم في أغلب أحياء وحارات جدة سواء كانت الأحياء القديمة أو الجديدة.. ما تمشي في شارع رئيسي أو زقاق فرعي إلا وتلاقي قدامك أكوام وأكوام من القمايم اللي بهدلت السكان بريحتها المعفنة واللي بسببها جابت لهم الأمراض وكترت بسببها الحشرات، والمصيبة انه هادي القمايم أحرجت سكان هادي الأحياء لما يجوهم ضيوف يزوروهم ويعيدوا عليهم تشوف كل واحد منهم حاطط شماغه على خشمه عشان لا ينصرع من ريحة القمايم اللي منتشرة في كل مكان.. وياريتها جات على كدا وبس إلا مويات المجاري كملت الناقص في أيام العيد ماتمشي في (شارع كيلو 2) والصحيفة والعمارية إلا والمجاري قدامك بهدلت الشوارع وحفرتها وبهدلت السكان بعفنها وقرفها.. ياناس ياهووه يامسؤولي أمانة جدة ويامسؤولي الشركة الوطنية للمياه خافوا الله في عباد الله الين متى وجدة حتقعد تشتكي من القمايم ومن المجاري، الين متى ونحنا ما نقرأ ولا نسمع منكم إلا الوعود والتصاريح وفي كل الجرايد وانه عندكم حلول جذرية لهادي المشاكل اللي بتعاني منها جدة ومن سنين طويلة ؟، الين متى والدولة بتدفع ملايين الريالات عشان تكون جدة في أحسن حالاتها ؟، كفاية أعذار وكفاية حجج لا تودي ولا تجيب، نبغى عمل ونبغى شغل يحس فيه المواطن عشان بعد كدا نقول لكم شكرا وكتر الله خيركم.. لكن الواحد ايش يقول إلا عيشوا كتيييييير تشوفوا كتيييييير..
هرجـة: أتمنى من أمانة جدة انها تلغي تصاريح بسطات العيد واللي بتاخد عليها رسوم طالما حبايبهم ومراقبيهم حيطبوا على أصحاب البسطات الساعة 12 من ليلة العيد ويقولوا لهم شيلوا عفشكم.
• أحمد عبد الله حاسن كبوها .. كل عام وانت بخير وصحة وسلامة.

للتواصل أرسل sms إلى 88548 الاتصالات ,636250 موبايلي, 737701 زين تبدأ بالرمز 150 مسافة ثم الرسالة


abofatoo@hotmail.com